കമ്പോള നിലവാരം

മരുന്നുകൾക്ക് വേണ്ടി രോഗങ്ങളെ നിർമ്മിക്കുന്നു.
ഉൽപന്നങ്ങൾക്ക് വേണ്ടി ആഗ്രഹങ്ങളെയും
ആയുധങ്ങൾക്ക് വേണ്ടി തീവ്രവാദികളെയും.
ഇതാണിന്നെത്തെ ആഗോള കമ്പോള നിലവാരം.

ചൂട്ടെഴുത്തുകൾ

ഓരോ വായനയും
ഒരായിരം വാതായനങ്ങളാണ്

ഓരോ എഴുത്തും
ഒരായിരം എയ്ത്തുകളാണ്

പ്രവാസീയം

വേരുകളെ
വസന്തങ്ങൾ
അന്വേഷിക്കാറില്ല.

സർഗം

ആകാശത്തിൽ വലിയ ചിത്രം വരയ്ക്കാനായിരുന്നു ചെറുപ്പത്തിലെ മോഹം. പക്ഷെ,വളരുംതോറും ആകാശം അപ്രാപ്യമായി തോന്നി. ഇപ്പോൾ മനസ്സിലൊരു കുഞ്ഞാകാശം നിർമ്മിച്ചു. തോന്നുന്നതൊക്കെ കുത്തിവരച്ച് വലിയ ആകാശത്തോട് കലഹിക്കാൻ .

സൗഹൃദം

കാലുകൾ വിറയാർന്നതും
കൈകൾ വിരലു ഞെരിച്ചതും
വായ പല്ലിറുമ്മിയതും
ശരീരത്തിലെവിടെയന്നറിയാത്ത
മനസ്സ് വേദനിച്ചതിനാലായിരുന്നു.

നോട്ട് - ഔട്ട്

ഉഴുതുമറിച്ച ഭൂമിയിൽ വിത്തിട്ട് കാത്തിരുന്നു.
വേരുകൾ മുകളിലേക്കും ഇലയും കനികളും
മണ്ണിലേക്കുമെന്ന പുതിയ രാജകൽപന
പാവം കർഷകനറിഞ്ഞിരുന്നില്ല.
വേരുകൾ വാനം തൊട്ടിട്ടും ഫലങ്ങൾ കാണാതെ
മെലിഞ്ഞുണങ്ങിയ കർഷകനെ കഴുകൻമാർ
കൊത്തിവലിച്ചു.

ജീവിതം

മിന്നാമിനുങ്ങിന്റെ ഇത്തിരി വെട്ടം മതി
നമ്മുടെ ജീവിതത്തിന് വെളിച്ചമേകാൻ.
ചിത്രശലഭത്തിന്റെ ചിറകുകൾ മതി
നമ്മുടെ ജീവിതത്തിന് ചാരുതയേകാൻ.