പരിശ്രമം
പൊട്ടിവീണ ആകാശ കഷ്ണങ്ങൾ വിളക്കിച്ചേർത്ത് ഭൂമിയിൽ ഒരു കുഞ്ഞാകാശമുണ്ടാക്കാൻ ശ്രമിച്ചു. കണ്ടവരും കേട്ടവരും അസഭ്യവാക്കുകൾ ചൊരിഞ്ഞു. എതിർപ്പുകൾ വകവെക്കാതെ നിർമ്മാണം തുടർന്നു. ഞാൻ തീർത്ത കുഞ്ഞാകാശം കണ്ട് മുകളിലത്തെ ആകാശം എന്നെ അഭിനന്ദിച്ചു. അത് കണ്ട് നേരത്തെ കളിയാക്കിയവരും

നജീബ്

ഭീതി വിതച്ച വിഷപാമ്പുകൾ
മാളങ്ങളിൽ സുഖശയനത്തിലായിരുന്നു,
കാണാതായ തവളകൾ
പാമ്പുകൾക്കുള്ളിൽ
അന്ത്യകർമ്മങ്ങൾക്ക്
വിധേയമായതിനാൽ .

യുദ്ധവും സമാധാനവും

അവർ ആയുധങ്ങൾ നൽകി
ഇവർ ക്രൂരമായി യുദ്ധം ചെയ്തു
അവർ സമാധാന ദൂതരായി വന്നു.
ഇവർക്ക് യുദ്ധം നിർത്താനായില്ല.
അവർ സമാധാനപാലകരായി!
ഇവർ യുദ്ധക്കൊതിയൻമാരും !

ഇരുവഴിഞ്ഞി

ഇരുവഴിഞ്ഞി

ഒരു പ്രണയത്തിന്റെ
നിത്യനോവിലൊഴുകുന്ന
കണ്ണീർപുഴ.

സിറിയ

ഉറക്കത്തിലെവിടെയോ സിറിയൻ വഴി കളിലെത്തി. എതിരെ നടന്നു വരുന്ന പിഞ്ചുബാലനു വേണ്ടി കീശകളിൽ പരതി ചില്ലിക്കാശു നീട്ടി. കരഞ്ഞു കരുവാളിച്ച മുഖം നിസ്സംഗമായി നിന്നു ഇങ്ങനെ മൊഴിഞ്ഞു, ''അങ്കിൾ, ഇനി കരയാൻ കണ്ണീരില്ല. ഒരൽപം കണ്ണീര് മാത്രം തന്നാൽ മതി".

കമ്പോള നിലവാരം

മരുന്നുകൾക്ക് വേണ്ടി രോഗങ്ങളെ നിർമ്മിക്കുന്നു.
ഉൽപന്നങ്ങൾക്ക് വേണ്ടി ആഗ്രഹങ്ങളെയും
ആയുധങ്ങൾക്ക് വേണ്ടി തീവ്രവാദികളെയും.
ഇതാണിന്നെത്തെ ആഗോള കമ്പോള നിലവാരം.

ചൂട്ടെഴുത്തുകൾ

ഓരോ വായനയും
ഒരായിരം വാതായനങ്ങളാണ്

ഓരോ എഴുത്തും
ഒരായിരം എയ്ത്തുകളാണ്